Igl plural collectiv
Tscherts nomens on sper la furma digl plural cun -s ena furma digl plural cun la finiziun -a. Chella ins nomna igl 'plural collectiv'. Igls pleds cun chella finiziun expriman ena quantitad nundeterminada (betg defineida). Chegl vot deir tg'ins na canoscha betg igl domber exact.
Ia va en meil.
Te dastgas piglier dus meils.
Cun la meila digl agen iert fò la mamma ena barbalada. (plural collectiv)
Oters plurals collectivs frequaints:
igl peir – la peira
igl fretg – la fretga
igl bratsch – la bratscha
igl lenn – la lenna
igl nerv – la nerva
igl òss – l'òssa
Plurals collectivs cun midadas ortograficas:
igl crap – la crappa
igl det – la detta
igl piz – la pizza
igl bigl – la biglia
Dantant: igl rom – la roma
Siva igl plural collectiv stat igl verb aint igl singular.
La detta è marva digl freid.
La figlia ò pers la sia calour.
La pizza gleischa aint igl suglegl dalla seira.
Remartga:
Ins so furmar ulteriouras furmas collectivas cun ageid da suffixs collectivs:
-aglia/-eglia: igl movel – la muaglia, igl verm – la vermaneglia
-areia: igl hotel – la hotellareia
-maint/-mainta: nar – la narramainta, fier – la fieramainta, lader – la ladramainta
-am/-om: spess – igl spessom, la gagligna – igl gaglinam
Er siva chels pleds collectivs stat igl verb adegna aint igl singular:
La magistraglia fò en viadi.
Chella vermaneglia è disgustousa.